مش عارفة أنا عايزة إيه !!

ساعات كتير باحس إنى مش عارفة أنا عايزة إيه. يا ترى عايزة أقعد فى المدينة و اشتغل و احتك بالناس و لا عايزة أقعد في الريف و أعيش حياة الطبيعة من غير تليفزيون و انترنت و لا حتي كمبيوتر، ازرع و أربى إلى محتاجا و أعيش أورجانك :) و يمكن أفتح مدرسة و أعلم الأطفال و أحببهم فى القراءة و المعرفة. و لا عايزة أكمل دراساتى العليا و أوصل لحاجة مفيدة ممكن تتطبق و تفيد البلد بجد و بعد كده أسافر أكمل دراستى بره عشان أعرف أكتر و أتعلم أكتر و أشوف العالم. و يمكن عايزة أتجوز و أقعد فى البيت أخترع فى المطبخ و أربى أولادى صح و ابنى معاهم علاقات مميزة كان نفسى دايما اتمتع بيها مع أهلى. أو أدرس دينى بجد و أعرف و أقترب من ربنا أكتر وبعد كده أكون داعية لديننا الصح زى ما لازم يكون. حاجات كتير يمكن بعضها قريب من بعض و بعضها بعيد كل البعد، يمكن بعضها ممكن يتعمل مع بعض و بعضها لازم يتعمل لوحده. بجد مش عارفة بس إلى أنا عارفا إن أوقات كتير ببقى مش مبسوطة و لما بقعد مع نفسى باحس إن السبب فى إنى مش عارفة فعلا أنا عايزة إيه و مش عارفة أنا ممكن أنجح فى إيه و المفروض اكمل فيه و غالبا هافشل في إيه و المفروض أبعد عنه. و فى النهاية الأمر بيفضل معلق و بافضل أحاول فى كل الطرق يمكن مرة أوصل للطريق الصح.