تحيا الأمة العربية

على طول الناس بتقول إن العرب والمصريين فى الخارج وحشيين أوى مع بعض وإنه بدل ما يتكاتفوا بيتنافسوا إلخ... أنا الحقيقة ما عشتش بره لكن سفرت كتير شوية ولاحظت قد إيه المصريين والعرب عامة كتير فى أوروبا. الحقيقة لما الواحد يفكر فى الموضوع يحزن ويحس قد إيه بلادنا ظالمة أهلها. المهم المره دى كنت فى النمسا وأول عربى قابلته كان صاحب المطعم إلي إتعشيت فيه، مغربى بقى له عشرين سنة فى فيينا. طبعاً عرف إننا مصريين، يعنى أصحاب الثورة، و إحتفى بينا جداً وكمان خلى المشاريب على حسابه. آخر مره إتعشيت عنده قبل ما أسافر بيوم إدانى عشرة يورو، وإنتو عارفيين اليورو بقى بكام دلوقتى، عشان أتبرع بيهم لضحايا الثورة. واحد مصرى شغال فى المحل لما عرف إن أنا مصرية، أتوصى بعمل البيتزا ودوقنى أحلى بيتزا فواكه بحر دوقتها فى حياتى (كمان حط لى عليها أربع محارات مممم). العربي التالت قابلته فى القطار وأنا رايحة المطار، طبعاً كنت نازلة بصعوبة من العربية وأنا شايلة الشنطة قام مد إيده وخدها منى وقالى "خلينى ساعدك" بعدها قالى إنه جزائري وعنده صحاب كتيير فى مصر وطلب منى أسلم له على كل الناس فى مصر.

يمكن دول يكونوا الإستثناء للقاعده بس أنا حاسه غير كده وشايفة إنه كفاينا تعميم وتقليل من شأننا لأن أننا كويسين أوى بس ساعات الظروف بس بتبقى ضدنا.

مطار فيينا

13 مايو 2011